അയയ്ക്കുന്നു നിങ്ങളെ

സ്വര്‍ഗ്ഗരാജ്യത്തിന്‍ സദ്‌ വാര്‍ത്തയുമായിതാ

നിങ്ങളെയെങ്ങുമയയ്ക്കുന്നു ഞാന്‍

സ്നേഹവും സന്തോഷവും സമാധാനവും

നട്ടുവളര്‍ത്തുക ഭൂവിലെങ്ങും

ആലംബഹീനരുമാകുലചിത്തരു-

മായിക്കഴിയുന്നു ഭൂവില്‍ ജനം

വന്നിരിക്കുന്നു സ്വര്‍ഗ്ഗം ഭൂവിലെന്ന സദ്‌ -

വാര്‍ത്തയവരെയറിയിക്കുക

തിന്മയും ഭീതിയുമാകുല ചിന്തയും

മാറ്റുക മര്‍ത്യമനസ്സില്‍ നിന്ന്‍

ശത്രുതയ്ക്കേകിടാം മൈത്രി പകരമായ്

തിന്മയ്ക്ക് നന്മ പകരം ചെയ്യാം

ഏവരും നിങ്ങളെ ആഹ്ലാദത്തോടെ കൈ -

ക്കൊണ്ടിടുമെന്ന്‍ കരുതിടണ്ട

ചെന്നായ്ക്കള്‍ നിങ്ങള്‍ക്കായ് കാത്തിരിക്കുന്നുണ്ട്

ജീവനെടുത്ത് രക്തം കുടിപ്പാന്‍

എങ്കിലുമൊട്ടും ഭയക്കേണ്ടയാരെയും

കാണുന്നെല്ലാമീശനെന്നറിക

ഈശനറിയാതൊരു മുടിനാരുപോ -

ലും താഴെ വീഴുകില്ലെന്നറിക

നിങ്ങളെ കൈക്കൊണ്ടീടുന്നവര്‍ സത്യമായ്

എന്നെയാകുന്നു കൈക്കൊള്ളുവത്

എന്നെക്കൈക്കൊള്ളുവോരേവരും സത്യമായ്

കൈക്കൊള്‍വൂ സ്വര്‍ഗ്ഗസ്ഥനാം താതനെ

മത്തായി 10

ഉള്ളടക്കം