വേര്‍പാടിന്‍ മതില്‍ക്കെട്ട്

കൂടപ്പിറപ്പുകളേശാവും യാക്കോബും

സ്നേഹിക്കും മാതാപിതാക്കളൊപ്പം

സ്വര്‍ഗ്ഗസമാനമാം സ്വന്തഭവനത്തില്‍

ഏറ്റവുമാമോദാല്‍ പാര്‍ത്തുപോന്നു

യാക്കോബൊരു നാളില്‍ ജേഷ്ഠനായ് ഭാവിച്ച്

അന്ധനാം താതന്റെ പക്കല്‍ നിന്നും

കൈക്കലാക്കി ജേഷ്ഠനുള്ളയവകാശം

കൂടപ്പിറപ്പിനെ വഞ്ചിച്ചവന്‍

വാര്‍ത്തകേട്ടേശാവ് ക്രോധാകുലനായി

തന്നെ വിഢിയാക്കി വഞ്ചിച്ചോനാം

കൂടപ്പിറപ്പിനെ ഇല്ലായ്മ ചെയ്യുവാന്‍

മൂര്‍ഖനെപ്പോല്‍ തക്കം പാര്‍ത്തിരുന്നു

കോപാന്ധനായിടും ജേഷ്ഠന്‍റെ കണ്ണില്‍പ്പെ -

ടാതതി വേഗത്തില്‍ മിന്നല്‍ പോലെ

വീടുവിട്ടോടി യാക്കോബതി ദൂരത്തി-

ലെത്തി സ്വമാതൃകുടുംബമതില്‍

മാതൃസഹോദരന്‍ ലാബാന്‍റെ ഗേഹത്തി

ലെത്തിയധികം കഴിയുമ്മുമ്പെ

ലാബാന്റെ സുന്ദരിയാകും മകള്‍ റാഹേല്‍

യാക്കോബിന്നുള്ളം കവര്‍ന്നെടുത്തു 

വീണുകിട്ടിയൊരാ നല്ലയവസരം

നന്നായ് മുതലാക്കുവാനായ് ലാബാന്‍

രണ്ടു ദശാബ്ദങ്ങള്‍ യാക്കോബിനെ ക്കൊണ്ട്

ക്രൂരമായ്‌ ചെയ്യിച്ചടിമപ്പണി

ലാബാന്റെ ഹീനമാം വഞ്ചന കണ്ടിട്ട്

യാക്കോബ് തന്നുടെ ബാല്യകാലേ

സ്വന്തസഹോദരനോട് താന്‍ വഞ്ചന

കാട്ടിയതോര്‍ത്തേറ്റം ദു:ഖിതനായ്

ജേഷ്ഠനെ നേരിട്ട് കണ്ട് ക്ഷമാപണം

ചെയ്യുവാനൊട്ടേറെയാഗ്രഹിച്ച്

ഏറെ സമ്മാനമൊരുക്കിയതി ദീര്‍ഘ -

യാത്ര ചെയ്തെത്തി സ്വദേശത്തയാള്‍

ജേഷ്ഠനെക്കണ്ട മാത്രേയേഴ് പ്രാവശ്യം

സാഷ്ടാംഗം വീണു നമസ്കരിച്ചാന്‍

എശാവോ വേഗത്തില്‍ സ്വന്തമനുജനെ

മാറോടു ചേര്‍ത്തു പിടിച്ചണച്ചാന്‍

ഒട്ടേറെ നേരമാ സോദരര്‍ വാവിട്ട്

കേണുപോയ്‌ അക്കണ്ണീര്‍ത്തുള്ളികളില്‍

വഞ്ചനതീര്‍ത്ത വേര്‍പാടിന്‍ മതില്‍ക്കെട്ടി -

ടിഞ്ഞ് തകര്‍ന്നങ്ങൊലിച്ചുപോയി

യാക്കോബ് ഗദ് ഗദം ചൊല്ലിനാനീവണ്ണം

നിന്‍ മുഖത്തിന്നു ഞാന്‍ ദൈവമുഖം

തന്നെ ദര്‍ശിച്ചിടുന്നേനിതാ സോദരാ

വഞ്ചകനെന്നോട് നീ ക്ഷമിച്ചു

ഉള്ളടക്കം