ഏവരെയും ഒരു പോലെ മാനിക്കാം

നാം സ്വയമെങ്ങനെ മാനിച്ചിടുന്നുവോ

അവ്വിധം മാനിക്കാമേവരെയും

കാണാം മനുഷ്യനെ മാനുഷനായിട്ട്

മറ്റ് വിധങ്ങളില്‍ കണ്ടിടാതെ

നാം സ്വയം മാനിക്കും കീശയ്ക്കുള്ളില്‍ പണം

കൂടിയെന്നാലും കുറഞ്ഞെന്നാലും

അവ്വിധമാരെയും മാനിച്ചിടാം കീശ-

യ്ക്കുള്ളിലെന്തുണ്ടെന്ന് നോക്കിടാതെ

നാം സ്വയം മാനിക്കും നമ്മുടെ വസ്ത്രത്തിന്‍

മോടി കുറഞ്ഞാലുമേറിയാലും

അവ്വിധമാരെയും മാനിച്ചിടാം വസ്ത്ര-

ത്തിന്‍ മോടിയൊട്ടും ഗൌനിച്ചിടാതെ

നാം സ്വയം മാനിക്കും നമ്മുടെ ദേഹമി-

രുണ്ടതായാലുമ തല്ലെങ്കിലും

അവ്വിധമാരെയും മാനിച്ചിടാം ദേഹ-

ത്തിന്‍ നിറമൊട്ടും ഗൌനിച്ചിടാതെ

നാം സ്വയം മാനിക്കും നാട്ടിലെമ്പാടുമ -

റിയപ്പെട്ടെന്നാലുമില്ലെങ്കിലും

അവ്വിധമാരെയും മാനിച്ചിടാമവര്‍-

ക്കുള്ള പ്രശസ്തി ഗൌനിച്ചിടാതെ

നാം സ്വയം മാനിക്കും നാം വസിക്കും വീട്

കൊട്ടാരമായാല്‍ കുടിലൊന്നായാല്‍

അവ്വിധമാരെയും മാനിച്ചിടാമവര്‍ -

ക്കുള്ള വീടെവ്വിധമായെന്നാലും

നാം സ്വയം മാനിക്കും നമ്മുടെ സ്ഥാനമ -

ത്യുന്നതമായാലുമല്ലെങ്കിലും

അവ്വിധമാരെയും മാനിച്ചിടാമവര്‍-

ക്കുള്ള സ്ഥാനത്തെ ഗൌനിച്ചിടാതെ

ഉള്ളടക്കം