സര്‍വേശന്‍ നാട് വാഴുമ്പോള്‍

ഈശന്‍ നൃപനായ് ഭരിക്കുകിലെങ്ങനെ

യാകുമന്നീലോകത്തിന്നവസ്ഥ?

കുറ്റമില്ലാത്ത ഭരണമുണ്ടായിടും

സ്വര്‍ഗ്ഗം പോലായിടും ഭൂമിയന്ന്‍

നീതിമാനായീ ശന്‍ മാത്രമേയുള്ളെന്നാല്‍

നാമെല്ലാം തെറ്റ് വരുത്തുന്നവര്‍

എന്നറിഞ്ഞന്യോന്യം തെറ്റുകുറ്റങ്ങള്‍ ക്ഷ-

മിച്ചിടുമേവരുമന്ന്‍ നാട്ടില്‍

ശത്രുക്കളെപ്പോലും സ്നേഹിച്ച് തന്നുടെ

മിത്രങ്ങളാക്കിടുമീശ്വരനെ

മാതൃകയാക്കി പരസ്പരം സ്നേഹിച്ച്

ജീവിക്കുമേവരുമന്ന്‍ നാട്ടില്‍

സര്‍വജ്ഞനീശ്വരന്‍ മാത്രമാണെന്നതാല്‍

ജ്ഞാനത്തിന്‍ കുത്തകയാര്‍ക്കുമില്ല

എന്നറിഞ്ഞേറ്റം തുറന്ന മനസ്സുമായ്

ജീവിക്കുമേവരുമന്ന്‍ നാട്ടില്‍

സര്‍വ്വാധികാരി സര്‍വേശ്വരന്‍ മാത്രമാ-

ണീശന്‍ തരാതധികാരമില്ല

എന്നറിഞ്ഞുത്തരവാദിത്തത്തോടെന്നും

ജീവിക്കുമേവരുമന്ന്‍ നാട്ടില്‍

സമ്പത്തിനെല്ലാമുടമ സര്‍വേശ്വരന്‍

സ്വന്തമായാര്‍ക്കും സ്വത്തില്ലിവിടെ

എന്നയറിവോടെ സമ്പത്ത് കൈകാര്യം

ചെയ്തിടുമേവരുമന്ന്‍ നാട്ടില്‍

ഭീതി യും വൈരവുമാകുലചിന്തയും

ഉള്ളത്തില്‍ നിന്നും തുടച്ചുനീക്കി

ഈശനെയുള്ളത്തില്‍ ദര്‍ശിച്ചുകൊണ്ടെന്നും

ജീവിക്കുമേവരുമന്ന്‍ നാട്ടില്‍

ഈശനോടും സഹജീവികളോടും നി -

രപ്പായി സൗഹൃദത്തോടെ സദാ

കൂടപ്പിറപ്പുകളെപ്പോലൊരുമിച്ച്

ജീവിക്കുമേവരുമന്ന് നാട്ടില്‍

ഉള്ളടക്കം