ശത്രുക്കളെ സ്നേഹിപ്പിന്‍

എവ്വിധം നാം സ്വയം സ്നേഹിച്ചിടുന്നുവോ

അവ്വിധം സ്നേഹിക്കാമേവരെയും

വൈരമാരോടും പുലര്‍ത്താതിരുന്നിടാം

ഏവര്‍ക്കും നന്മയാശംസിച്ചിടാം

ആരുമാരേയുമടിമപ്പെടുത്താതെ

സോദരരായ് ജീവിക്കാം നമുക്ക്

നന്മ മാത്രം ചെയ്ത് തിന്മയെ നേരിടാം

തിന്മ പകരം ചെയ്യാതിരിക്കാം

മിത്രത്തെ സ്നേഹിച്ച് ശത്രുവെ ദ്വേഷിപ്പ-

താകുന്നു ചുറ്റും നാം കാണുവത്

എങ്കിലോ നമ്മുടെ ശത്രുക്കളെപ്പോലും

സ്നേഹിക്കയത്രേ നാം ചെയ്യേണ്ടത്

നമ്മുടെ സ്വര്‍ഗ്ഗസ്ഥതാതന്‍ തന്‍ മക്കളെ

വേര്‍തിരിവില്ലാതെ കണ്ടിടുന്നു

നീതിമാന്‍ നീതികെട്ടോരെന്ന വേര്‍തിരി-

വില്ലാതെ സ്നേഹിക്കുന്നേവരെയും

മഞ്ഞും മഴയും വെയിലുമൊരുപോലെ

എവര്‍ക്കുമീശ്വരന്‍ നല്‍കിടുന്നു

നീതികെട്ടോര്‍ക്കിവ നല്‍കേണ്ടതില്ലെന്ന്

തീരുമാനിച്ചിടുന്നില്ലീശ്വരന്‍

ഏവരെയുമൊരുപോലെ സ്നേഹിക്കുന്ന

ദൈവത്തിന്‍ മക്കളാകുന്നു നമ്മള്‍

എന്നവകാശപ്പെടുന്നുവെങ്കില്‍ ദൈവ -

ത്തിന്‍ സ്വഭാവം നമുക്കുണ്ടാകണം

ഈശ്വരന്‍ സല്‍ഗുണ സമ്പൂര്‍ണനായിരി -

ക്കുന്നപോലാകണം മക്കള്‍ നമ്മള്‍

ശത്രുക്കളെപ്പോലും സ്നേഹിക്കുവാന്‍ നമു-

ക്കുണ്ടാകണം മനസ്സും കഴിവും

മത്തായി 5: 43 – 48

ഉള്ളടക്കം